လ်ုအ်ုဝီႋ ဍုံသုဓုမ်ဖိုင်ဏ်ှ ယောဝ်စဃွှာ(မကုဋ) ပိုင်ဝေ့ဍုံဌာန့်လှ်၊ အှ်ဃွှာခင်းထါ် ဟ်ုဍောဟ်ဟ်ုမူႋ ဖါဍာဟ်လ်ုဖးအ်ုဖိုင်ဏ်ှ ဖၠုံဟ်ုဍောဟ်ဟ်ုမူႋဖါဍာဟ် (ဖူ့ဍာ်ကဝ်) ဟ်ုစာ်တၠာဉာဏ်အှ်ဝေ့လ်ုၯာလှ်။ ဟ်ုဍောဟ်ဟ်ုမူႋ(ဖူ့ဍာ်ကဝ်)ၮှ် အင်းတာင်ပ္တံင်ထင်းၮေဝ်ႋဝေ့ ဖၠုံလိက်မောဝ်ႋဖၠုံး လိက်က်ုယိုင့်သီးၮှ်လှ်။
ဖၠုံတၠာဥာၮ်(ဖူ့ဍာ်ကဝ်)ၮှ် အင်းတာင်ပ္တံင်ထင်းၮေဝ်ႋဝေ့ ဖၠုံလိက်ခင်းထာ်ၯံင် ဆူ့ကေဝ်ဝေ့ဖၠုံလိက်လာဲၮှ်လှ်။ လိက်ပိဋကတ်”သိုင့်ပုံၮှ်သီး ခၠယ့်က္ဍာဆူ့ကေဝ်ထာင်ဝေ့ လ်ုဖၠုံဆ်ုခၠါင်ခဝ့် ၯံင်ဝေ့လုက်ဆိင့်ဆေဝ်ႋလှ်၊ ဖၠုံဆိုဒ်ဖေါဟ်အှ်(ဍုံသ်ုဓုမ်)ဖိုင်လ်ုဖး မုက်သင်းမုက်သာ မာလောဟ်ၮေဝ်ႋဝေ့ ကိုဝ့်ၯာဍေဆေဝ်ႋလှ်။
ဏိင်းသာထါ်(၄၁၉)ဏိင်း သာသၞာ့ဏိင်းသာထါ်(၁၆၀၁)ဏိင်းဏ်ှ အနိရုန္ဓ ပ်ုကင်(ပုဂံ)စဃွှာ ၯယ့်လင်ဍုဂ်ဝေ့(ဍုံသ်ုဓုမ်)ဏ်ှတာႋ ဟ်ုဍောဟ်ဟ်ုမူႋဖါဍောဟ်(ဖူ့ဍာ်ကဝ်)ၮှ် ဆူ့ကေဝ်ဝယ်ၯံင် လိက်ရုက်လးထူ့လ််ုဖးဏ်ှအိုဝ် ၜံင်းထင်းၯေဝ်အွာၯံင် ဍေအ်ုပိုင်ၰံင်ႋ ဖၠုံဆိုဒ်ဖေါဟ်လီသီးလ်ုဖး ယောဝ်ထင်းဏေဝ်ႋလိက်ထူ့ စာင်းၯာသူးဝေ့ လ်ုကေမူႋၮာၮှ်လှ်။
ပ်ုကင်(ပုဂံ)စဃွှာ အနိရုဒ္ဓဍုဂ်ၮေဝ်ႋ(ဍုံသ်ုဓမ်)ၯံင်ဍုံသ်ုဓုမ်ဟှံင် အင်းမာဏေဝ်ႋဝေ့လိက်ပိဋကတ်အ်ုထူ့သိုင့်ဆီ့ ပ်ုဍိုဒ်ထင်းဝေ့”လ်ုက်ုဆင့် သိုင့်ဆီ့ၮီဍူၮှ်လှ်။ ဖံင်းဏေဝ်ႋယောဝ်စဃွှာ “မကုဋ”ၯံင် ထါင်ဏေဝ်ႋထင်းဝေ့လ်ုဍုံ“ပုဂံ”အိုဝ်လ်ှ။ ယောဝ်စဃွှာ “မကုဋ”ဏ်ှ “မနူဟာ”သီး ဆ်ုကိုဝ်ဝေ့ဆေဝ်ႋလှ်။ စဃွှာအနိရုန္ဓဏ်ှ ထါင်ကိုဝ်ပျဝေ့ သင့်ဂၟီ့(၃ဝဝဝ) ဍေဍုံဖေါဟ် ဂမၠိုင်ႋ စူးသှ်ေခင်းမာ အ်ုၯာ (၃၀၀၀၀)ဏ်ှလှ်။
ဖၠုံဟ်ုဍောဟ်ဟ်ုမူႋဖါဍောဟ် အ္စာတၠာဉာဏ်(ဖူ့ဍာ်ကဝ်)ဏ်ှ ဍေမၞီဟ်အ်ုၯာ(၄ဝ) ၯာဏေဝ်ႋစာင်းဏေဝ်ဝေ့ ဖၠုံလိက်ထူ့ၮှ်လှ်။။ လေဝ်ထင်းၯာဝေ့ လ်ုမိင်လးကၠာ လ်ုထဝ်ၜးလ်ုထဝ် ထံင်ထင်းမိင်ဝေ့ ခါန်ဆိုင့်(ဌာန့်ဝ)ဖိုင်အိုဝ်လှ်၊ ဖူဍာ်ကဝ်ဏ်ှ အှ်မိင်ဝေ့လ်ု(ဌာန့်ဝ)ဖိုင် မာလေါဟ်ၮဲလောဟ်ဖှ်ေထာင် ဖၠုံလိက်လာဲသီးၮှ်လှ်။
(ဖူ့ဍာ်ကဝ်)လ်ုအှ်လိုင်ၜး လ်ုခါင့်ယိုဝ် ဖၠုံလိက်လာဲသီး ဆ်ုမာလောဟ်ယှာလင် ထါင်ဝေ့ အထဝ်ထဝ်ၮှ်လှ်။ လာဏင့်သီး လင်ဆိုဝ်ဖေါဟ်လင်ဆိုဝ်လီ မာလောဟ်ဏေဝ်ႋထါင်ဝေ့ ဖၠုံလိက်လာဲဏ်ှဍာ်လှ်။ ယောဝ်စဃွှာ ဍေပ်ုကင်(ပုဂံ) စဃွှာလ်ုဖး လေဝ်ထင်းဍုဂ်သါင့် ၜးဖိုင်သာအ်ုခေါဟ်စံင် ၜးစာင်းၜးၯာ အးဖိုင့်အးၜၠင် ဖၠုံလိက်လာဲခင်းထါ်ဏ်ှ လင်မာဆိင်းပြာခွိက်ဝေ့ဍးလှ်။ ၜိုဝ်ဏါင်းယိုဝ် အ်ုထိုဝ်အ်ုမေံအှ်ဍာ်ဏ်ှ ဖၠုံဆိုဒ်ဖါဟ်သီး အင်းတာင်ပ္တံင်ဆိုင်ထါင် ဖၠုံလိက်ခင်းထါ် အ်ှထဝ်ႋထာင်ထီ့ဆာဝေ့လှ်။
( ဖၠုံလိက်ပဝ်ႋသိုင့်ဆင့် )
Leave a Reply