ၯယ့်ထါင်ပါတၠာ က်ုသှ်ေ၊ က်ုဆင့်၊ ဆ်ုနိုင့်၊ ပၞာႋ
အ်ုခဝ့်ပ်ုယဝ့်?
ဖၠုံဖီ့ဖူ့ယှာႋလ်ုဝီႋခီလ်ုယာ့ဍးအိုဝ်သီးၮှ် မွာဲဝေ့ၜေ့သိုဝ်ခီအ်ုခါ့ယိုဝ်သိုဝ် စက်ခီ(စက်ခေတ်)လ်ုမွာဲဍာ် မှ်ေကျာအူခီ(လျှပ်စစ်မီး)လ်ုမွာဲဍာ်ခါ့သယ်ၮှ် ခီ့သင့်ဆ်ုထင်းအုဲးထင်းဖးလ်ုအှ်ပ်ုသာဍာ်ခါ့ၮှ် ခီလ်ုယာခါ့ၮှ် ၜူးလင်အင်းသာမိုင့် မာအင်းဆိက် မာအင်းၰုဂ် မာအင်းကၠောဝ် အင်းၜူးလင်သာဝေ့ဍးၮှ်လှ်။ စင်ၜိုဝ်ၮှ် မာအင်းဆိက် မာအင်းၰုဂ် မာအင်းကၠောဝ် သယ်ခါ့ၮှ် ဖၠာင်ႋစူ၊ ဆ်ုၜုဂ်ထာ(ပုက်တူႋ) ခၠုံ၊ သင်လုံ့၊ ထယ့်၊ ၰေံ၊ က္တာ်၊ လာင်း၊ လ်ုဖးၮှ်ၜးပါဝေ့ကၠ်ုကၠ်ုလှ်။ ထံင်သိုဝ်အ်ုကၠာ မ်ုထုဂ်လာင်း မ်ုထယ့်ဆ်ု ၜးလေဝ်ၜးထာင်ဆ်ုအေအှ်သယ်ၮှ် လ်ုအ်ုယာင်လ်ုဖး က်ုလုံ့လ်ုမၞီႋမာလ်ုကဲၜး က်ုလုံ့ၰိုင့်”က်ုလုံ့လင်ပွါ် လ်ုဖးသယ်အေအှ်ၮှ် အ်ုသီးဝေ့အင်းၜူးလင်ၮေဝ်ႋ လ်ုဆ်ုဖေါဟ်ၰာႋ လ်ုအ်ုၯင်ဍောဟ် ၯာင်ႋဆံင်းလ်ုဖးၮှ် အင်းၜူးလင်ၮေဝ်ႋ မာလောတ် အင်းမိုင့်က္ဍာက်ုလုံ့သယ်လ်ုဖးၮှ်လှ်။
စင်ႋၜိုဝ်အ်ုခေါဟ်ကျံင် လ်ုဆ်ုမာအင်းဆိက်”ထင်းလာင်း “ထယ့်ၯင်းခေါဟ်ၮှ် ဆ်ုနိုင့်(ခၠဴ”ဝဝ်ၜိင်း)ပၞာႋ သယ်ၮှ်ဖၠုံဆိုဒ်ဖေါဟ်လ်ုဝီႋ အင်းၜူးလင်အင်းမိုင့်ဝေ့ဍးလှ်။ အေၯံင်ၮှ်ဍဝ် လ်ုလေဝ်ဆ်ုလ်ုခဝ့်သယ်ၮှ်ဍဝ် ၜးသာလေဝ်ထံင်ဆ်ုဖၠဲ လေဝ်ၜးၰုဲ့ၰုဲ့လ်ုၯာၯင်ႋၮှ် ထုက်ထင်းဍေ”က်ုသှ်ေ အှ်ဝေ့လှ်။ ၜေ့ၮှ်သိုဝ်ဆေဝ်ႋ လ်ုဍုံဖိုင် “လ်ုမိင်လကၠာ အေမွာဲၜးထင်းဆ်ုလူႋထဝ့် ထုဂ်ဆ်ုၰိုင့်သီးဍဝ် အင်းမိုင့်ဍေ”က်ုဆင့် အှ်ဝေ့လှ်။
စင်ၜိုဝ်အ်ုခေါဟ်ကျံင် ထံင်အ်ုကၠာ ဟ်ုအေယောဝ်ႋထာင်ၮှ် ဟ်ုဖီ့ဖူ့သယ် လာခုဂ်ဖိုင်ခါင်ႋစူးခါ့ ရာဓနာႋဆောတ်ဖး ပါဍိင်ဝေ့ၮှ် ဍေပါတၠာ”က်ုသှ်ေ၊က်ုဆင့်၊ဆ်ုနိုင့်၊ပၞာႋ၊ဆ်ုခၠါင်လ်ုဖးယိုဝ် မွာဲဟ်ုဖီ့ဖူ့ ဍုဂ်ၮဲဖှ်ေဟ်ုပညာ့ လဝ်ဖၠံင့်ထင်းဟ်ုခေါဟ်နုက်ဆ်ုခၠါင်ဖိုင်သာအ်ုခေါဟ်ထိုဝ်ၮှ်လှ်။ ၜးလဲစာ်ၜိုဝ် ကဲထင်းမၞီႋသီး ၯာင်ႋဆံင်း”လေဝ်ဆ်ုဖၠဲယှာ့ၜေ့သိုဝ် က်ုသှ်ေ၊က်ုဆင့်၊ဆ်ုနိုင့်၊ပၞာႋ သယ်သိုဝ်မၞီႋအှ်ၮင်ႋမိင်အေး ၜေ့သာအှ်ၜးသာ ၯာင်ႋဆံင်းလေဝ်ဆ်ုဖၠဲယှာ့ မ်ုကဲထင်းသိုဝ် ၜးမာအင်းၰူ့မာၮေဝ်ႋထာင်ၯာင်ႋၜျာ လ်ုဆ်ုၰာႋၰံင်အှ်အိုဝ်ၮှ်လှ်။ ကြိုဒ်ဟ်ုသှ်ေယာ့ထံင်ၮာင်းၮေဝ်ႋ ၜးပါသ္တာ်ပညာ့ဆ်ုခၠါင်လ်ုမိင်လှ်။ ဟ်ုဖီ့ဖူ့ဆ်ုဆောတ်ဖး ဟ်ုၮးအေသှ်ၮှ်ေ ဟ်ုမာအင်းမာအဝ်အ်ုၯင်ႋ မွာဲဝေ့ဍုဂ်ၮဲပညာ့ကျိုင်ကျိုင် သုံအင်းသှ်ေကိုဝ့်ၮီဍေၮှ်လှ်။
လာၮင့်ၜိုဝ်သီး★★★★ထံင်ထာင်ခီအ်ုခါ့ယိုဝ် မၞီႋလ်ုဖး ၜေ့သာအှ်ၜးသာမ်ုၮေဝ်ႋ ၯာင်ႋဆံင်းလေဝ်ဆ်ုဖၠဲလ်ုဖးမ်ုအ်ှသိုဝ် လဝ်အ်ုဍံင်” မာအင်းဆိက် မာအင်းၰုဂ် မာအင်းကၠောဝ်”သယ်ခါ့ဍးယိုဝ်ၮှ် ၜးဍံင်ၜေ့အ်ုဝီႋသိုဝ်လိုင်အေး ခါ့မူဆာ့သယ်ယိုဝ်ၮှ် ဆ်ုမွာဲစက်ခီ(စက်ခေတ်)အ်ုခေါဟ်ကျံင် ကြိုဒ်ၜးမာၮေဝ်ႋထာင်ၰာင်ႋၜျာႋ ဍေ”စက်သယ်ၮှ်လှ်။ ခီအ်ုခါ့သယ်ဖိုင်ယိုဝ်” ဖၠဟ်ထင်းထာင်”စက်ထယ့်ဆ်ု၊ စက်ကုဂ်ၜူး၊ စက်ပၠိုင်ၜူး၊ စက်အ်ုမိင်မိင်လ်ုဖး ကြိုဒ်အင်းၰူ့သှ်ေယာ့ ၜးအင်းမိုင့်သှ်ေဝေ့အ်ုလင်ႋဍေအ်ုလင်ႋၮှ်လှ်။
ၜးဆာင့်က္ဍာ လေဝ်ဆ်ုဖၠဲ”ထုက်ၯာင်ႋၜျာဆံင်း ၜေ့မ်ုၮေဝ်ႋအး”ၜေ့ထံင်မ်ုဖၠဲၮှ်သိုဝ် ကာႋဖေါဟ်၊ ကာႋဖါဍောဟ်၊ ကာႋၜၠုင်းၯင်းခေါဟ်”ကာႋဆောတ်ထင်းဆ်ုၰိုင့်”အ်ုမိင်လ်ုဖးသီး ဍေဆာင့်ကယ်၊ က္ၜင်ယူ၊ က္ၜင်ထီ့၊ ခၠီ့ဖါဍောဟ်သယ်သီး ကြိုဒ်ဟ်ုအင်းၰူ့မာလောတ်မာဍံင် ၜးၮးသှ်ေအင်းမိုင့်အင်း ၜေ့မ်ုကဲထင်း မၞီႋက်ုလုံ့ဆ်ုဖါ်ဆ်ုမာအ်ုၯင်ႋ ကြိုဒ်အင်းၰူ့ ပါတၠာ”ထးအှ်ဝယ်ၮှ်လှ်။ ပါတၠာ”အေအှ်ဝယ်ၮှ်စာ်ၜိုဝ် ကဲထင်းဟ်ုမာၜိုဝ်မာဆိုင်ဍောဟ်ဝေ့တာႋ လ်ုဟ်ုမာလ်ုနိုင်ဆ်ုၰိုင့်”ဍေလေဝ်ဖၠဲ လေဝ်ဆ်ုယာင်လ်ုးဖး လင်ပွါ်သာလ်ုအှ်အှ်မ်ုယှာ မ်ုယှူးၜှ်ဝေ့ဟ်ုသယ်လ်ုမိင်ၮှ်လှ်။ စင်ႋၜိုဝ် ၜေ့ခေါဟ်နုဂ်အှ်ထုဂ်ဖၠဟ်ထင်းမ်ုသှ်ေသိုဝ် ကြိုဒ်ပါတၠာသှ်ေထးဝယ် မွာဲဖၠုံဆိုဒ်ဖောဟ်သီး ဟ်ုဖီ့ဖူ့ဆ်ုခၠါင် ဟ်ုၜးၮးသှ်ေလ်ု မ်ုမာဆ်ုလ်ုမိင်မိင်ၜေ့မ်ုကဲထင်းသိုဝ် ပါတၠာဆ်ုခၠါင်ၜးၮင်းထင်း ၜးပ္ကုံထးဝယ်လှ်။ ဆ်ုလ်ုမိင်မိင်ၜးအှ်ထးဝယ် ဖံင်းဖါ်ၜးမ်ုယဝ့်သုံႋၜးမ်ုယဝ့် မ်ုယှူးၜါထင်းထဝ်ၮေဝ်ႋဟ်ုဝေ့လှ်။
( ဆ်ုနိုင့်ဆာႋအဲဆိုဒ် )
Leave a Reply