ဖၠုံဆိုဒ်ဖောဟ်ဖီ့ဖူႋလ်ုအ်ုဝီႋ ဖေါဟ်လီအ်ုၯင်ႋ လဝ်အင်းသံင်းဆ်ုခၠါင် အှ်ဝေ့အးမိင် ဍုဂ်ၮဲဝေ့ဍေအ်ုဍံင်အှ်အးမိင်လှ်၊ လိုဒ်ကာ ဆ်ုခေါဝ်ႋဆ်ုၯဝ် ဆ်ုတ်ုဒုက်ထံင်ခါ့သီးၮှ် ခၠိုဝ်လင်သာၜေ့ထုင်းၜးခေါဝ်ႋဝဝ်လ်ုအှ်ဍောဟ် ၜေ့သာလ်ုၜးထါ်ၜး လ်ုယှုဂ်ဖၠိင်ဖၠင်းၜးသိုဝ် အေၯံင်ၮှ် ဆီ့ထုင်းထာင်က္ဍာ ၜေ့မ်ုသှ်ေ ၜေ့မ်ုၯုင်ႋခိုင့်သိုဝ် လဝ်အ်ုဍံင် ဍုဂ်ၮဲဍံင်ဝေ့ အ်ုဍံင်အှ်အးမိင်ဝေ့လှ်။
လ်ုမိင်ၮှ်အ်ုကၠာ လဝ်အ်ုဍံင်ပ်ုသှ်ေလဲ့စာ်ၜိုဝ် ဟ်ုအေယောဝ်ႋထာင် ယှာႋလ်ုဝီႋ မာၜုံး”အင်းၜူးသင့်ခေါဟ်သယ်ခါ့ၮှ် ဍုဂ်ၮဲပျလင် လဝ်ပျလင်အ်ုခဝ့်ပ်ုယဝ့် ၜးပါဝေ့ကၠ်ုကၠ်ုလှ်။ မွာဲၮှ်လဲ့စာ်ၜိုဝ် မွာဲ(သိုင့်လ်ုဖိုင်)လှ်၊ မွာဲသိုင့်ၮှ်လဲ့ မွာဲပါဍေၮှ်လဲ့ မွာဲအ်ုခဝ့်ပ်ုယဝ့်ၮှ်လဲ့စာ်ၜိုဝ် မွာဲဝေ့(သိုင့်ၰူး)ထီ့ၮှ်လှ်။ လ်ုအ်ုဝီႋ ဖၠုံဆိုဒ်ဖေါဟ် အင်းၜူးသင့်ခေါဟ်သယ်ၮှ် (သိုင့်ၰူးထီႋဍေခၠောဟ် အေလ်ုမွာဲ သိုင့်ၰူးထီႋဍေဍေဟ်)အင်းဖံင့်ပါဝေ့လှ်၊ ၯယ့်ၜုံးဟ်ုမုဲ ၯယ့်ၜုံးဂမၠိုင်ႋလ်ုဖး ၜးအင်လင်ဝေ့ကိုဝ့်ၯာဍေလှ်၊ (သိုင့်ၰူးထီႋဍေဍေဟ်”ဍေခၠောဟ်)သယ်ၮှ် ယောဝ်ႋဍံင်အင်းမာၮေဝ်ႋအ်ုခဝ့်ပ်ုယဝ့်သယ်ၮှ်လှ်။
ၰူးထီႋ” အ်ုခဝ့်ပ်ုယဝ့်ၮှ် ဆ်ုလ်ု(ၰူႋထုင်းသီးၮှ် မိုင့်ဝေ့လ်ုဆ်ုဆိုင်ခါ့လဝ့် အေထံင်လ်ု”အုဂ်တုဂ်ဆ်ုခေါဝ်ႋခါ့ၮှ် အ်ုထုင်းၰာင့်ထာသီ့ခွိက်ဝေ့လှ်၊ ဆ်ုခုင်းထင်းခွိက်အ်ုထီႋလုက်ဆိင့်သီး အှ်ထဝ်ႋထာင်သာ့အ်ုဝီးၮှ်လှ်၊ လာၮင့်သီး အ်ုဝီႋလ်ုဖးၮှ် အေထံင်ထာင်အုဂ်တုဂ်ဆ်ုဆိုင့်ခါ့ၮှ် ဆ်ုအေဆိုင်ၜးဍေထီ့စာ်ၜိုဝ် အ်ုဝေ့မဲထင်းထာင်က္ဍာအ်ုဝေ့ၮှ်လှ်။
စင်ၜိုဝ် ဖၠုံဖေါဟ်လီလ်ုဖး ယောဝ်ႋဍံင်ၮေဝ်ႋအ်ုဍံင် ၜေ့ၰူးထုင်းသိုဝ် ၜးအ်ုခါ့တံင်ၮံင်းလာၮင့် ဍေဆ်ုကးဆ်ုၯယ်သီး ထုင်ႋကျာယဝ်ယဝ့်ၰေဝ် ဆဲဆံင်းထင်းသာ ၜးအ်ုခါ့ၮှ် ၜးဆီ့ထုင်းထာင်က္ဍာၜးသှ်ေဝေ့ ဍေဖၠုံဆ်ုမာၜိုဝ်မာဆိုင်လ်ုပါၜးသီး ၜးၯယ့်ထုင်းအှ်ၯုင်ႋသာပ်ုက်ုဆာႋပ်ုဝေ့ၮှ် မာၮေဝ်ႋဝေ့အ်ုဍံင်အ်ုခဝ့်ပ်ုယဝ့်ၮှ်လ်ှ။
ဍေဟ်” အ်ုခဝ့်ပ်ုယဝ့်ၮှ် ဆ်ုဖေါဟ်ၰာႋ ဍေဟ်သီးယိုဝ် ၜးအ်ုခါ့ဆ်ုယဝ်ခါ့ ထီ့သယ်ယှာၯင်းခေါဟ်ၰယ်ထင်းခါ့ၮှ် အ်ုသီးဝေ့ၜးတံင်ၮံင်းဍေဆ်ုကးဆ်ုၯယ်ၮှ် ဟ်ုဍးကၠင် ဍေဟ်”အှ်အးပ်ုသာလိုင်အေး အ်ုသီးဝေ့အှ်ကှ်ေသူးသာ အွးလင်ၜိုင်လင်သာလ်ုၯင်းခေါဟ်ဖင့်လသယ်ၮှ်လှ်။ အေမွာဲ အေထံင်ထာင်လ်ုဆ်ုဆိုင်လင်ခါ့ၮှ် ထီ့သယ်အှ်ထင်းထာင်က္ဍာၮှ် အ်ုသီးၯယ့်ဖၠဟ်ထင်းထာင် ဍီးလင်ထာင်ဝေ့အ်ုဍီးလ်ုဖး ဖာထင်းထာင်လ်ုၜၠင် အ်ုသီးဆိုဒ်ဖောဟ်သယ်အးထင်းထာင် အ်ုသီးဆိုဒ်ဖေါဟ်လင်ထုက်ဝေ့အေးၮှ်လှ်။
စင်ၜိုဝ် ဖၠုံဆိုဒ်ဖေါဟ်ဖီ့ဖူ့သီးၮှ် မူ့လာဝေ့ဖေါဟ်လီလ်ုဖး တံင်ၮံင်းလာၮင့်ဆ်ုကးဆ်ုၯယ်သီးၮှ် သာပေဝ့်ထုင်ႋကျာလ်ုအှ်ၜး က်ုဆာႋၯင်ႋ ဍေ”စူယာ့ခေါဟ် လင်ဆိုဝ်ဖောဟ်လင်ဆိုဝ်လီၯင်ႋ လင်ထုက်ၜးအေးသြုင်ႋၜးအေး မူ့လာယောဝ်ႋထိုဝ်ယောဝ်ႋထိုဲ့ထ္ၜာထာင်ဆိုဒ်(အ်ုဆိုဝ်) ဆ်ုစီကၠာဍောဟ်ထင်းထာင်ဍးဝေ့ ဆင်းထိုဲ့လောဟ်လ်ုဆင့်လ်ုဆင့်သှ်ေဍာဝေ့ၮှ်လှ်။
ခၠေါဟ်” အ်ုခဝ့်ပ်ုယဝ့်ၮှ်သီး မဝ့်မှ်လောဟ်သာဍေ”ဍေဟ်ၮှ်လှ်။ ကဲထင်းမၞီႋသီးယိုဝ် တံင်ၮံင်းၜး လိုဒ်ကာဆ်ုကးဆ်ုၯယ်သယ်ခါ့ လင်ၜးဝီႋဆ်ုအှ်သာ လ်ုၯာင်ႋၜျာယှာ”ၯာင်ႋၜျာဆာႋခါ့ ဆ်ုးကးဆ်ုၯယ်လ်ုဖးသီးၮှ် တံင်းၮံင်းၜးၮှ် ဆဲဆံင်းထင်းသာ ထုင်ကျာလင်ထီႋဖါႋၜးလ်ုၰေဝ်ၮှ်လှ်။
ၜေ့”ခၠေါဟ် သိုဝ်ဆေဝ်ႋ ၜးထာင်အ်ုခါ့ လ်ုဆ်ုယဝ်ခါ့ၮှ် ၜးတံင်ၮံင်းဍေဆ်ုကးဆ်ုၯယ် မာလ်ုၜးအ်ုခါ့ၮှ် ၜးအှ်သူးၜိုင်လင်သာဝီႋ လ်ုၯင်းခေါဟ်ဖင့်လးဖိုင် ထံင်ဆ်ုဆိုင်လင်လ်ုထီးၮှ်လှ်။ အေထံင်ထါင်ဆ်ုဆိုင်ခါ့ ထီ့အှ်ထင်းထာင်လ်ုဆိက်ဖိုင် လ်ုၮံင်းဖိုင်လ်ုၜၠင်းၮှ် ခၠေါဟ်”ၯယ့်ဖၠဟ်ထင်းက္ဍာ ဍီးလင်က္ဍာ ဖါထင်းထာင်အ်ုသီးဆိုဒ်ဖေါဟ် အှ်ထင်းထာင်ဝေ့လ်ုပုံၮှ် အ်ုသီးဝေ့ၜးထုင်ႋလိုဒ်ကာဆ်ုယှင်းဆ်ုၮာ လာၮင့်သီး ထုင်ႋကျာဝေ့ ဍာလင်ထုက်အ်ုဆိုဒ်ၮင်ႋၜၠင်အေးၮှ်လှ်။
ၜေ့ၮှ်ဆေဝ်ႋဟ်ုဖၠုံဆိုဒ်ဖောဟ်သယ်လ်ုဖး အှ်အ်ုမိင်မိင်ၜးတံင်ၮံင်းဍေလိုဒ်ကာ ဆ်ုယှင်းဆ်ုၮာလာၮင့်သီး ဟ်ုက်ုဆာႋအ်ုၯင်ႋ ဟ်ုဆိုဒ်ဖေါဟ် ဟ်ုဆိုဝ်မ်ုလင်ထာင်လ်ုဖး စူယာ့ခိုတ်အ်ုၯင်ႋ ၜေ့မ်ုၯေဝ်ဍောဟ်ထင်း သုင်းသာၜေ့မ်ုၮံင်ၜေလုံႋၜေ့ထာ ထုင်ႋဆ်ုယှင်းဆီ့ထုင်းထာင်မ်ုၮေဝ်ႋသိုဝ် ဖီ့ဖူ့လဝ်ဖှ်ေလင့် ဍုဂ်ၮဲဖှ်ေအ်ုဍံင် ၰူးထုင်း ဍေဟ်ဍေ”ခၠေါဟ် ယောဝ်ႋဍံင်ၮေဝ်ႋ ဆင်းထိုဲ့ထ္ၜာလောဟ်သာ လ်ုၯာဍေလ်ုၯာ လ်ုဆင့်ဍေလ်ုဆင့် ပ္ကုံပညာ့လဝ်လောဟ်ဍုဂ်ၮဲလောဟ်ထာင်သာ ကၠေစိုဒ်ကုက်မာ လင်ထီ့ဖာႋလ်ုအှ်ၮင်ႋၜၠင် အ်ုကျးၯင်ႋဆီ့ထုင်းၯုင့်ခိုင့် စီကၠာဍးဝေ့ၮှ် ဖၠုံဆိုဒ်ဖောဟ် အင်ၜူးသင့်ခေါဟ်ခါ့ၮှ် ၜးအင်းဖံင့်(ၰူးထီႋအင်းဖံင့်ဍိင် ဍေဟ်ဍေခၠောဟ်)သိုင့် ၜးပါဝေ့မွာဲဆေဝ်ႋလှ်။
(ဆ်ုနိုင့်ဆာႋအဲဆိုဒ်)
Leave a Reply