လ်ုအ်ုဝီႋဍးအိုဝ် တ်ုဝါန့်အှ်လ်ုဖၠုံးအ်ုဖိုင်ၮှ် ဆ်ုဖူ့ယှာႋအှ်ဝေ့လ်ုၯာ အ်ုမိင်”မွာဲဝေ့မာန်စေဝ်ဖဝ့်”ၮှ်လှ်။ အှ်လ်ုၮီ အ်ုဝေ့လေဝ်ခုက်ၮေဝ်ႋ သိင်းဖာဍောဟ်လ်ုထုင်းၯံင် ဆံင့်မံင်းဝေ့ မ်ုတာင်ၮေဝ်ႋခၠီ့ၮင်ဖၠုံးဆေဝ်ႋလှ်။ အ်ုၮင့်ဆာႋၮှ် တာင်ခၠီ့လ်ုသှ်ေၜးလာၮင့်သီး အ်ုဝေ့ကိုဝ်ၮေဝ်ႋ ဆြာ့ၮင်ႋၯာအေး။
မာန်စေဝ်ဖဝ့်”ၮှ် တာင်ဝေ့ခၠီ့လ်ုဖိုင်ၮာင်ၮှ်တာႋ ပ်ုယှာႋလာင်ႋလံင်လ်ုဖိုင်သာၮှ်လ်ုဖး ၯယ့်လ်ုၯာလဝ်လောဟ်ဖှ်ေလ်ုမိင် ၊ ၯယ့်လ်ုၯာလဝ်လောဟ်ဖှ်ေလ်ုမိင်ဆေဝ်ႋလှ်။ ပ်ုယှာႋအးၯာ ၯယ့်လဝ်လောဟ်ဖှ်ေအ်ု အးမိင်အ်ုခေါဟ်စံင် သိင်းဖာဍောဟ်လ်ုထုင်းၮှ် ၯာၯံင်ဝေ့တာႋ ကဲထင်းခၠီ့သှ်ေလိုင်အေးလှ်။
ထံင်ၮှ်ၯံင် အ်ုဝေ့စှ်ဆံင့်မံင်းယောဝ်ႋအ်ုသာ ခၠီ့ယိုဝ်အေလ်ုကဲထင်းၜးလာၮင့်သီး မိင်ဖၠာဲၮင်ၜိင်းၮှ် မ်ုကဲထင်းဝေ့ဍာ်လှ်။ စှ်ဆံင့်မံင်းလင်အ်ုသာၜေ့ၮှ်သိုဝ်ၯံင် ဖံင်းၮေဝ်ႋထာင်”အ်ုၰေံဍေအ်ုကွာ”ၮှ်တာႋ တာင်ထင်းထာင်ဝေ့ မိင်ဖၠာဲလ်ုၜိင်းၮှ်ဆေဝ်ႋလှ်။ ၜေ့သိုဝ် တာင်ခၠီ့ၮှ်သိုဝ်ဆေဝ်ႋ လ်ုခါင့်ယိုဝ်သီး ပ်ုယှာႋၯယ့်လဝ်လောဟ်အ်ုဍဝ်ဆေဝ်ႋလှ်။ ပ်ုယှာႋအးၯာ ၯယ့်လဝ်လောဟ်အးမိင် အ်ုခေါဟ်စံင် အ်ုမိင်ဖၠာဲၮှ်သီး ၯာၯံင်ခွိက်ဝေ့ဍဝ်ဆေဝ်ႋလှ်။
ထံင်ၮှ်လ်ုဖိုင့်တာ အ်ုဝေ့စှ်ဆံင့်မံင်းလင်ထာင်အ်ုသာ မိင်ဖၠာဲၮှ် အေလ်ုကဲထင်းၜးလာၮင့်သီး ယ်ုအေတာင်ဍး ယ်ုဝေ့ဍးလ်ုၯာ ၰယ်ၰယ်စာ်ၜိုဝ် နောတ်ဝှးၮင်ႋၜိင်းသီး မ်ုကဲထင်းဍာ်ဝေ့ဍာ်လှ်။ လ်ုခါင့်ယိုဝ် ပ်ုယှာႋၯယ့်လဝ်လောဟ်ဖှ်ေအ်ု လာၮင့်သီး အ်ုဝေ့ဍးမာၮေဝ်ႋအင်း ဟ်ုမၞီႋအ်ုဆ်ုခၠါင် ၮင်ႋၯာလိုင်အေး တာင်ဝေ့ဍးအ်ုလ်ုၯာၮှ်လှ်။ ထံင်ၮှ်လ်ုဖိုင့် တာင်ဝေ့နောတ်ဝှးလ်ုၜိင်းၮှ် ကဲထင်းသာ့ဝေ့ဆေဝ်ႋလှ်။
ဆ်ုလဝ်ဆ်ု ဆြာ့အးကဲထင်းနောတ်ဝှး ဆ်ုခၠါင်ၮှ် ကဲထင်းဝေ့အ်ုခင်းထာ် ထံင်ၮှ်ဆေဝ်ႋလှ်။
( ဖၠုံလိက်ပဝ်ႋလ်ုဆင့် )
Leave a Reply