ခိုဲယိုဝ် ဖၠုံဆိုဒ်ဖောဟ် ဆ်ုဖောတ်ဆ်ုအူးဖိုင်လ်ုဖး မွာဲဆ်ုဖောတ်ဆ်ုအူး လ်ုဆ်ုၜး အူးယှောဝ့်သ်ုဝါ် ဍေနိုဝ် ဆ်ုအူးလ်ုမိင်လှ်။ ခိုဲယိုဝ် ဖၠုံဆိုဒ်ဖောဟ် ဆ်ုဖောတ်ဆ်ုအူးဖိုင်လ်ုဖး ကၠောဟ်ဏ်ှၯံင် မွာဲဝေ့ဍး ထ်ုယဝ်ႋပြာထာ့ ဆ်ုသှ်ေယာ့အးထုက် လ်ုမိင်ဆေဝ်ႋလှ်။ အေဍးလင်ခိုဲၯင်ဏှ် မွာဲဖၠုံဆိုဒ်ဖောဟ်သီး အ်ုဆိုဒ်ဏာင်း ဆ်ုသှ်ေယာ့ကိုဝ်ၯာဍေလ်ှ။
ခိုဲဏ်ှဍဝ် (၁)ခိုဲဓံင့်၊ (၂)ခိုဲစေဝ်၊ (၃)ခိုဲထံင်ႋ၊ (၄)ခိုဲက်ုဆင့်မဲ၊ (၅)ခိုဲပၞာႋနုံ၊ (၆)ခိုဲၜှ်ေနုံ၊ (၇)ခိုဲသိင်း၊ (၈)ခိုဲဝး၊ (၉)ခိုဲဆ်ုနိုင့်(ဝဝ်ၜိင်း)နုံ၊ (၁၀)ခိုဲဆ်ုၜင်နုံ၊ (၁၁)ခိုဲထောဟ်ကိုဝ်နောတ်၊ သယ်အှ်ဝေ့ (၁၁)မိင်ဆေဝ်ႋလှ်။ လာႋဏင့်ၜိုဝ် ခိုဲယိုဝ် ဆ်ုတာင်ဍေ ပၞာႋနုံယိုဝ် မွာဲဝေ့အးဏှ် ဆ်ုသှ်ေယာ့အးထုက်လှ်။
ခိုဲယိုဝ် အ်ုထဝ့်သိုင့်စောဝ်အ်ှ၊ ဏီ့စောဝ်အှ်၊ လ်ုထာ့အှ် အ်ုဖိုဟ်အ်ုထဝ့်အှ်ဝေ့ အးမိင်ဆေဝ်ႋလှ်။ ခိုဲဏီ့စောဝ်ၜၠဲဏ်ှ ဆ်ုတာင်အးထုက်လှ်။ ပၞာႋနုံမွာဲအ်ုၯေဝ်၊ ဆ်ုၜင်နုံ မွာဲအ်ုၯေဝ် မာထေံခွိက်အ်ုခင်းထာ် ဍေအ်ုခီ့ထိုဝ်ၯံင် ထံင်အ်ုကၠာဏ်ှ မာဖၠံင့်ဝေ့အ်ုဖိုင် ဏင်ႋစူးမူႋလ်ုဖိုင်လှ်။ ဖၠာဖုံႋၯံင် တာင်ဏေဝ်ႋအ်ုဖၠေဝ် ဍေစေဝ်ပး လ်ုမွာဲၜး ဍေထံင်ႋပးသယ် ပၠုက်လင်ထးဝေ့ ထံင်အ်ုဖိုင်ဖုံႋထိုဝ်ဏှ် အှ်ဝေ့ ဍိင်ခိင့်လင်လ်ုပေဝ့်လှ်။ အ်ုဖၠေဝ်အေဆံင်းထၠိုင့်ခဝ့် ဏ်ုအူးၜးဍာသီး သဝ့်ကဲအေး၊ ၜးအူးယှောဝ့်ပျ အေဆံင်းဆေဝ်ႋလှ်။
အေအူးထင်းခိုဲဏှ်ဍဝ် ကိက်ထင်းခိုဲမောဝ်ႋယှာႋ အ်ုခေါဟ်ထိုဝ်ခါင့်ထိုဝ်ဏှ်ဍေစူးလာခဝ့်ၯံင် ၜးအူးသာ့ခိုဲဖိုင်ဏှ်လှ်။ စူးလ်ုလ်ုၰိုဝ်ခဝ့် ကိက်အ်ုခါင့်ထိုဝ် ၜးကာၜါ်ထး အ်ုဖိုင်ဏှ်လှ်၊ စူးလ်ုအ်ုစှ်ေခဝ့် ဍေစူးယာ့သာ ၜးကါၜါ်ထး အ်ုဖိုင်ဖုံႋထိုဝ်ဏှ်ဆေဝ်ႋလှ်။ အေၜးသာ အ်ုလူႋပေဝ့် အ်ုလူႋခိင်ႋအိုဝ် ၜးပုဂ်ထင်းစူး လ်ုအ်ုခါင့်ထိုဝ်ဏှ်လှ်။ အေၜးသာ အ်ုလူႋအေဍောဟ် အ်ုလူႋလင်ဝင်အိုဝ် ၜးပုဂ်ထင်းစူး လ်ုအ်ုခေါဟ်ထိုဝ် လ်ုခဝ့်ဏ်ှလှ်။ ၜေၜးသာအ်ုလူႋ ၜေမ်ုဍုဂ်ထင်းၜးသာဏှ် အ်ုခေါဟ်ထိုဝ် အ်ုခါင့်ထိုဝ်လာႋခဝ့် ၜးလံင်ဆင်းပျ ဍေစူးလာႋခဝ့်ဏှ်လှ်။
ခိုဲယိုဝ် အူးထင်းဝေ့ အ်ုလူႋသဝ့် ကဲအ်ုမိင်မိင်လှ်။ ခိုဲအေသဝ့်ထင်းယိုဝ်၊ မွာဲဝေ့ဍး ကိုဝ်ကုံတ်ုဝါန့်ဖောဟ် လ်ုမွာဲၜး ၜးလေဝ်ကုံ ဆ်ုလေဝ်ထင်းၰုက်ဖိုင် လေဝ်ထင်းကုဂ်ၜူးသယ်လှ်။ လေဝ်ထင်းဆ်ုဍုဂ်သီး အူးထင်းဝေ့ ဍေခိုဲဏှ်ဆေဝ်ႋလှ်။ ၜးဝေ့ဍး ဏိင်းဍောဟ်လာထဝ့် ဏိင်းထင်းသင့်၊ အင်းၜူးသင့်ခေါဟ်၊ လေဝ်အင်းတၠာမုဂ် အှ်ၰုက်ခါင်စူးခါ့ဏှ် အူးဍေခိုဲ ဍောဟ်ပျ ဍေကၠောဟ်၊ဍေမံင်သယ်ဏှ်လှ်။ ယုဂ် ယာန်းထင်း အ်ုဆိုဒ်ဖောဟ်အ်ုလေင်ႋ ယုဂ်ယာန်းထင်း အ်ုဆိုဒ်ဖောဟ် မ်ုထုင်းလီႋတုင်ႋဏှ်သီး အူးထင်းဍေခိုဲ လဝ်ၯိုင့်လောဟ်သာဆေဝ်ႋလှ်။ ခိုဲယိုဝ်မွာဲဝေ့ မာကုံထင်းမၞီဟ် မာၰုဲ့သုင်းသာယဝ့်ထင်းဝေ့ မၞီဟ်သီးသုင်းသာ ဆ်ုဖောတ် ဆ်ုအူးလ်ုမိင်လှ်။
ခိုဲဝးဏှ် မွာဲဝေ့ဖောဟ်သးဖၠာဲ အှ်ခိုဝ်ၰုဂ်သယ်ခါ့ အူးကိုဲဝေ့ဍးလှ်။ခိုဲက်ုဆင့်မဲဏှ်အှ်ယှာ မွာဲဝေ့ဍး တ်ုဝါန့်ခေါဟ်၊သုဂ်ခေါဟ်ဖါဍောဟ် ဟ်ုသင့်မင်သယ် အူးဝေ့ဍးလှ်။ ခိုဲက်ုဆင့်မဲယိုဝ် အ်ုၰိုဲဍောဟ်စွး ဆ်ုၰိုဲဏေဝ်ႋကြင်အေးလှ်။ ခိုဲက်ုဆင့်မဲဏှ်ဍဝ် လ်ုဏင်ဏှ် ဆွာင့်ဝေ့ဍး ပါကဲအ်ုၰီ့ ဍေဓံင့်ပးသယ်သီး အှ်လ်ုဏင်လှ်။
ခိုဲပၞာႋနုံဏှ် အးထုက်လှ်။ ကိုဝ်ဍုံကိုဝ်တ်ုဝါန့်ဍေ ဖၠုံဆိုဒ်ဖောဟ်လ်ုဖး အူးဝေ့ဍး အးထုက်ဏှ် မွာဲဝေ့ဍး ခိုဲပၞာႋနုံဏှ်လှ်။ လ်ုဏင်ဏှ်ဍဝ် ခိုဲပၞာႋနုံလံင်ဏှ် မာဝေ့အ်ုဆာင် ဍေစေဝ်ပး ဍေဖၠီဍေဖဝ့်သယ်လှ်။ ပၞာႋနုံဏှ် အ်ုဖိုင်အှ်ဝယ် အ်ုထဝ့်ဏင်ဖၠာႋဏှ်လှ်။ ၜုဂ်ထင်းအ်ုခီ့ထိုဝ် ၜုဂ်စူးလီႋဏှ် ဖၠာဖၠံင့်ဝေ့ ဖာႋစူးဍေဝ်ဏင်ဖၠုံးၯံင် ထင့်ထင်းဝေ့အ်ုဖၠေဝ် ဍေစေဝ်ပးထံင်ႋပးသယ် အူးထင်းပါကဲ ခိုဲဏှ်လှ်။
ခိုဲထောဟ်ကိုဝ်နောတ်ဏှ်ဍဝ် ဆောတ်ၜးၰုဲ့ အ်ုလူႋခိင်ႋစွးအ်ုခေါဟ်ကျံင် ဖောဟ်သးဖၠာဲသယ် ဆ်ုနိုင့်ဆာႋသယ် ဆောတ်အူးကိုဲဝေ့လှ်။ ခိုဲယိုဝ် မွာဲဝေ့ဍး ဟ်ုဆိုဒ်ဖောဟ် ဆ်ုၰူ့ဆ်ုၰင် သုင်းက်ုလုဂ် သာက်ုလုဂ် (သုင်းထ်ုလုံ့သာထ်ုလုံ့) အ်ုဏာင်းလ်ုမိင်လှ်။
{ ဖၠုံလိက်ပဝ်ႋယာဲဆင့် }
Leave a Reply