ဖၠုံဆိုဒ်ဖောဟ်သီးယိုဝ် မာဆိက်မာဏာၯံင် ၜူးသင့်ထံင်ထင်း လ်ုၜူးဖင့်ဖိုင်စာ်ၜိုင် လ်ုဏိင်းလ်ုၜၠင် ကိုဝ်ဏိင်းဍေ မာပ္တံင်ဝေ့ဆ်ုၜုံး အင်းၜူးသင့်ခေါဟ်ဏ်ှလှ်၊ အင်းလင်ၜူးသင့်ခေါဟ်ယိုဝ် လ်ုတ်ုဝါန့် ဍေလ်ုတ်ုဝါန့် လ်ုစံင်းဍေလ်ုစံင်း ၜးဍံင်လောဟ်သာအေး၊ လ်ုဏင်ဏ်ှ လ်ုၜူးၯံင် လာလိင်ယောတ်ထင်းဏ််ှ အင်းလင်ၜူးသင့်ခေါဟ်လှ်၊ လ်ုဏင်ဏ်ှဍဝ် ထာင့်ခုက်ဖောဟ်ယောတ်ထင်းဏ်ှ အင်းလင်ဝေ့ ၜူးသင့်ခေါဟ်လှ်။
အင်းလင်ၜူးသင့်ခေါဟ်ဖဝ်ႋစာ်စိုဝ် ဆုင်း၊ ခၠိင်းဆူ့၊ ဖိုင်ၯုက်လ်ုဖးဏ်ှ ဍောဟ်ထောတ်ဝေ့ ဍေနောက်ဝှ ကိုဝ်စူးလာၯံင် ခါင်ႋဝေ့ဍေထောဟ်ကာင်ကောဝ်ႋယောတ်ဏ်ှ သိုင့်ဝင့်ဏ်ှလှ်၊ အင်းလူ့လင်ၯံင်ဝယ် ၜူးသင့်အာင်သင့်ဏ်ှဍဝ် ၯုက်ဝေ့အင်းဆူသာ့ဝေ့လ်ှ။
အာင်သာဏ်ှ ၜံင်းဝေ့မေဝ်အာင်ထံင် အင်းဆူ့ဏေဝ်ႋမေဝ်သေဝ် တာင်ဏေဝ်ႋမေဝ်အာင်ဍူးလှ်၊ ၜူးသင့်ဏှ် အင်းဖံင့်ထင်းဝေ့မေဝ်ၯံင် သိုင့်”ၯူးထီႋ”ဍေခၠေါဟ်ဟ်လ်ုမွာဲၜး သိုင့်”ၯူးထီႋ”ဍေဍေဟ်ဏ်ှ အင်းဖံင့်ဏေဝ်ႋဝေ့ၯံင် လၟံင်ႋဏေဝ်ႋသုင်းကေဝ်သာယှာႋ ဍုဂ်အင်းပ်ုကျာၯံင် ဆောတ်ၜုံးထာင်ဝေ့ ၯိင်းဆာႋဏ်ှလှ်။
ၜးအင်းဖံင်သိုင့် ၯူးထီႋ၊ဍေခၠေါဟ်၊ဍေဍေဟ်ဏ်ှ မွာဲၜးဏ်ှလဲ။? ဆ်ုလ်ု”ၯူးသီးယိုဝ် ဆ်ုယဝ်ခါ့ ဟ်ုဍးအ်ုလးဏင်ႋၜိင်းအေး၊ လာႋဏင့်သီး ဆ်ုဆိုင်လင်လ်ုၜၠင် “ၯူးမဲထင်းထာင်ကိုဝ်ဏိင်းဍေလှ်၊ “ခၠေါဟ်သီး”ဍေဟ်သီးယိုဝ် ဆ်ုယဝ်ခါ့ ထီ့သာ်ခါ့ ၜိုင်လင်သာ လ်ုဖိက်လဏှ် လ်ုဍးၜးလာဏင့်သီး ဆ်ုဆိုင်လင်ခိုဝ်း “ခၠေါဟ်သီး”ဍေဟ်သီး အှ်ထင်းထာင်ဝေ့ဆေဝ်ႋလှ်၊ မွာဲၜေဏ်ှသိုဝ် ပ်ုဖၠုံဆိုဒ်ဖောဟ်သီးလ်ုဖး တံင်ဏံင်းလာဏင့် ဍေဆ်ုကးၯယ် အ်ုမိင်မိင်သီး လင်မာႋသှ်ေလာႋဝေ့လ်ုၰေဝ်၊ “အ်ုဆိုဒ်ၜံင်ခိုင့်ဏံင် ယိက်လာႋဆာ်ဏ်ှ အင်းလင်ၜူးသင့်ခေါဟ် ဍေ”သိုင့်ၯူးထီႋ”ဍေဍေဟ်”ဍေခၠေါဟ်ဏ်ှလှ်။
လ်ုဏင်ဏ်ှဍဝ် ထိုင့်ဖူ့ဝဲါလ်ုစုဂ် ပ္တံင်ထင်းသာ မာဝေ့အင်းလင်ၜူးသင့်ခေါဟ်ဏ်ှလှ်၊ လ်ုဏင်ဏ်ှဍဝ် ထိုင့်တ်ုဝါန့်သာ့ သၟဝ့်ၰူ့ၰင် မာကုံမာဆိုင်ဝေ့ အင်းလင်ၜူးသင့်ခေါဟ်ဏ်ှလှ်၊ လ်ုဏင်ဏ်ှ ဆီ့ဆဲတ်ုဝါန့် မာကုံသၟဝ့် အင်းလင်ၜူးသင့်ခေါဟ် ဍေဆ်ုအာင်လင်၊ ဍေတုံႋ၊ လ်ုကံင်ႋ၊ က်ုဆိင့်ပွယ်သ္ဘေင်ႋ၊ မာၜုံးမာၜါ၊ ပ်ုကျာဍုဂ်အင်းဝေ့ ကိုဝ်ၯာဍေလှ်။
မေဝ်ၜူးသင့်၊ ဍေသိုင့်ၯူးထီႋ၊ ခၠေါဟ်၊ ဍေဍေဟ်ဏ်ှ အင်းလင်ၯာစယ်ၯာစယ် ကိုဝ်ၯာဍေလှ်၊ အေအင်းၜး ၜူးသင့်ခေါဟ်ဏ်ှ ဖံင်စုဂ်ဖံင်ဆာ့ ၜုံးဍောဟ်သာထဝ့် အှ်ၜးဝေ့ယှူးမုက်ၜှ်ယဝ့် ကိုဝ်ဆိုဝ်ဍေလှ်၊ အင်းလင်ၜူးသင့်ခေါဟ်ၯံင် မေဝ်ဍေသိုင့်ဆင့်ယး။ သိုင့်ထောဝ်ယး လ်ုဖး ဆာႋမွာဲၯယ့်ဂမၠိုင်ႋဏ်ှအိုဝ် ပ်ုကျာဍုဂ်အင်းဝေ့ ကိုဝ်ၯာဍေလ်ှ၊ ဍေဆ်ုဖောတ်အူး ဏာႋဍိင် သင့်ထံင်ႋ ဍေထုင်းလီႋတုံႋ ၊ သုင်းၰုဲ့သာယဝ့် ကိုဝ်ပါင်ဖ်ုအဝ် အင်းလင်ၜူးသင့်ခေါဟ်ဏ်ှ မာပ္တုဲ(ပ်ုဒ်ှ)ဝေ့ လ်ုဏိင်းလ်ုၜၠင် ကိုဝ်ဏိင်းဍေလှ်။
{ ဖၠုံလိက်ပဝ်ႋသိုင့်ဆင့် }
Leave a Reply