ဆ်ုဍူးဆ်ုၰုဲႋ ဟ်ုမၞီဟ်ဍုံလုက်ကောဝ်ကြင် ဆ်ုၰီ့လာဍုဂ်ပါင်လ်ုဖး ဆ်ုဍူးၮှ်အှ်ဝေ့ထၟာႋလှ်။ ဖၠုံဆိုဒ်ဖေါဟ်သီးဆေဝ်ႋ အ်ုဆိုဒ်ၜေ့မ်ုၯုင်ႋခိုင့်သိုဝ် ၜေမ်ုဆိင့်ပြင်သိုဝ်ၮှ် အှ်ကှ်ေလဴ အင်းတာင်လင်ဝယ်ဝေ့ဆ်ုဍူးၮှ်လှ်။ လ်ုၯာဍေလ်ုၯာ လ်ုၯိင်းဍေလ်ုၯိင်း ၜးပါဍောဟ်ယုဂ်ယာန်ႋဒ္ဂေဟ်ၮှ် အှ်ကှ်ေဝယ်ဝေ့ၯံင် လင်ၜးၜးဍူးပွယ်ဒ္ဂေဟ်ၮှ်အိုဝ် အေလ်ုဍူးပွယ်မာထၠိုင့်ၜးၮှ်တာႋ ၜးအင်းယာ့ထါင်၊ၜးက်ုလိုဝ်ထါင် ၜးဖှ်ေလင့်ထါင်ဆ်ုပူဇဴၮှ် ကိုဝ်ဝေ့ဍး ဍေဆ်ုၰုဲႋၮှ်လှ်။ ဆ်ုဍူးအှ်ဆ်ုၰုဲႋအှ်ဝေ့ အ်ုခေါဟ်ကျံင် ထၠိုင့်တ်ုဖၠးအေသှ်ေ မာၯေဝ်မာၜးထါင် ၜးအှ်ဝေ့ဆေဝ်ႋလှ်။
ဆ်ုဍူးလ်ုဖးၮှ်ၯး—— ဆ်ုၰာၰံင်ၯိင်းဖိုင် ယုဲးၜးနိုဝ်အေး၊ ဍယ်လင်ၜးစူးအေး၊ အေလေဝ်ထင်းၯိင်းဖိုင် ၜးထင်းလ်ုၰင့်လံင်ၮှ်လှ်။ ထင်းပ်ုလုက်ၜး ၯိင်းထုင်းလံင်အေး၊ စာင်းလင်ထါင်ခိုဝ်းဍဝ် ၜးစာင်းလင် လ်ုၯယ့်ထင်းဝယ် ၰင့်ၮှ်လှ်။ ၯိင်းဖိုင်ၮှ် ဖၠုံၰာႋၰံင်သယ် ၯင်းၜးအေး၊ သုင်းထင်းသာၯာင့်ၜး ဆ်ုအေး၊ အာင်းလောတ်သာၜး ဆ်ုအေး၊ အေထင်းဆ်ုၯိင်းဖိုင် ဍင်းၜးၯိင်းထုင်းအေး၊ ဆ်ုသုဂ်ဆ်ုမးအှ်၊ ဖောဟ်မာ့အှ်လ်ုဖး တာင်ၯေဝ်ဆ်ုလ်ုၯံင်ဍာ်ၜး စာင်းထင်းၜးဆ်ုၯိင်းဖိုင်အေး၊ လ်ုၮင်ၮင်ၯိင်းဖိုင်ၮှ် ဆောတ်ထင်းၜးသာ်အေး၊ လာင်းယှောဝ့်ၜးကျုင်ႋၜး ၯိင်းထုင်းအေး၊ ယှောဝ့်ၜးထောတ်တိုင်အေး၊ ဖူ့လင့်ၜး ဆ်ုၯိင်းဖိုင်အေး၊ ခွိက်ၜး ဆ်ုၯိင်းအေး၊ အေၯံင် မ်ုလေဝ်ပၠိုင်ဆ်ုသီ့ ဝူးဆးဍင်ဝူ့ဆးၜံင်းသယ် ဆောတ်ထင်းၜးဆ်ုၯိင်းဖိုင်အေးၮှ်လှ်။ လ်ုၮင်ၮင် လေဝ်စာင်းကိုဲဖၠုံၯိင်းခါ့ ထင်းၯိင်းဖိုင်ၰင့်သွာ့အေခါႋစာ်ၜိုဝ် ၯိင်းဆာႋၮှ် ဍေအ်ုၯိင်းၰင့်သွာ့ခါႋၮေဝ်ႋ အ်ုခေါဟ်ကျံင် ၜးဖှ်ေထါင်ဝေ့ဖၠုံမုဲဆ်ုဍူးၮှ်လှ်။ ဖၠုံမုဲခဝ့်ဍဝ် ထာင်စာင်းလင်ၯိင်းဖိုင်ခါ့ ၰင့်သွာ့အေခါႋစာ်ၜိုဝ် ၜးဖှ်ေထါင် ၯိင်းဆာႋဆ်ုဍူးၮှ်လှ်။
ဆ်ုၜးဍူးပွယ်ဒ္ဂေဟ်ပ်ုဝါလ်ုဖးၮှ် အေမာထၠိုင့်ၜးစာ်ၜိုဝ် ၜးဖှ်ေလင့်ၯိင်းဆာႋ ဝူ့ဆး၊ အာင်သာ၊ ဖဝ့်၊ ပၞါင့်၊ ဖိုင့်ဆာင်းယာ့ၜင်၊ ဍေစေဝ်ယာဲၜိင်း ၜးၰုဲႋထါင်ၯိင်းၮှ်လှ်။ ၜးဖှ်ေလင့် ဆ်ုဍူးသီးကိုဝ်ဝေ့ဍးလှ်၊ ဍုံတ်ုဝါန့်ဖိုင် ဆ်ုမူးဆ်ုခွါ့ ဆ်ုမးအေအှ်သီးဍဝ် ၜးက်ုလိုဝ်ထါင်တ်ုဝါန့် ဍေထုက်လ်ုဖၠုံး၊ စေဝ်နိုဲ့ၜိင်းၮှ်လှ်။ ဖောဟ်ဍေမောဝ်ႋ၊ ဖောဟ်ဍေဖါႋ၊ ဖူႋဍေဝဲါ၊ အေမးထင်းသီးဍဝ် မွာဲဝေ့ဍး လင်ထုဲး လင်ထောဝ်အ်ုခေါဟ်ကျံင် ၜးခွယ်လင်ၰင့် ၜေ့ထုဲးသိုဝ် ၜးအင်းမေဝ်ခၠေါဝ်ဖိုင် ၜးၮင့်ၯာခွိက် လ်ုဍုံထိုဝ်ဍုံၮာ့တ်ုဝါန့်ၰံင်အိုဝ်လှ်။ အှ်ၜးတ်ုဝါန့်ဖိုင်အေး၊ တ်ုဝါန့်ဖောဟ်သီးယာထူႋဆိုင်ခွိက်ဝေ့လှ်။
ဆ်ုဍူးလ်ုဖးၮှ် ဖၠုံဆိုဒ်ဖေါဟ်သီးလ်ုဖး ၜးဍူးပွယ် ၜးဖံင်းကိုင် ဒ္ဂေဟ်ဆိုင်ကိုဝ်ၯာဍေလှ်။ အေမာထၠိုင့်စာ်ၜိုဝ် ၜးက်ုလိုဝ်ပူဇဴ ၜးဖှ်ေထါင်ဆ်ုၰုဲႋၮှ်လှ်။ ဆ်ုသုဂ်ဆ်ုမးအှ် အင်းၰူ့အ်ုၮင့်ဆာႋ အေလ်ုၜးလိုင်ၜးစာ်ၜိုဝ် ၯိင်းဆာႋၮှ်လဝ့်ၜးတာင်လင်ၮေဝ်ႋထါင် ဆ်ုက်ုလိုဝ် ဖိုင့်ဆာင်း၊ယာ့ၜင်၊ ၜးက်ုလိုဝ်ထါင်ၯိင်း ၜးၰုဲႋထါင်ဝေ့ၯိင်းၮှ်လှ်။
စင်ၜိုဝ် ဆ်ုဍူးဆ်ုၰုဲႋယိုဝ် ၯေဝ်ထင်းၮေဝ်ႋဖၠုံဆိုဒ်ဖေါဟ် ၯုင်ႋခိုင့်ၮေဝ်ႋဖၠုံဆိုဒ်ဖေါဟ် မွာဲဝေ့ အ်ုထါ်အ်ုၜံင်လ်ုမိင်ဆေဝ်ႋလှ်။ဆ်ုဍူးဆ်ုၰုဲႋလ်ုအှ်ၜး ဖၠုံဆိုဒ်ဖေါဟ်ယိုဝ် မ်ုၯာၯံင်ၯာယှာႋ စွးဝေ့ဆေဝ်ႋလှ်။
( ဖၠုံလိက်ပဝ်ႋၰူ့ဆင့် )
Leave a Reply