ဖၠုံဆိုဒ်ဖောဟ်သီး အှ်မံင်ဂိုဝ်လီးယး ခေါဟ်လံင်ဆ်ုထင်းထင့်ၯံင် သုဂ်လင်ထာင်သာ ခေါဟ်လံင်ခင်းထာ် ကောဝ်ၜီပြင်ပ္တီဏာင်ၯံင်ဏှ် ပ္တံင်ဍုံတ်ုဝါန့် အှ်ဍိင်ဍေ တ်ုရုဂ်ဆိုဒ်ဖောဟ်သယ် လ်ုဖးဏ်ှလှ်။ တ်ုရုဂ်ဆိုဒ်ဖောဟ်သယ် ၜေပါဍောဟ်ယုဂ်ယာန်းမောဝ်ႋဖာႋသီ့ထၠိင့်မောဝ်ႋဖာႋဝိ(ဝီး)လာဏှ်သီး ယုက်ဂုဏ်က်ုလိုဝ် ပူဇဴက်ုလိုဝ်ဍုဂ်အင်းပ်ုကျာဝေ့သိုဝ် ဖၠုံဆိုဒ်ဖောဟ်လ်ုဖးသီး ပါဍောဟ်ယုဂ်ယာန်းမောဝ်ႋဖာႋ သုဂ်အင်းသုဂ်အဝ် လ်ုဆိုဝ်တာၯံင် သီ့ထၠိုင့်ထာင် ကဲဖၠူႋဖောဟ်ၰိုင်ဖောဟ် မောဝ်ႋဖာႋဝိ(ဝီး)လာဏ်ှသီး လ်ုဏိင်းလ်ုၜၠင် ပူဇဴက်ုလိုဝ် ဍုဂ်အင်းပ်ုကျာ ယုက်ဂုဏ်က်ုလိုဝ် ကိုဝ်ဏိင်းဍေ လ်ုဏိင်းလ်ုၜၠင်ဏ်ှလှ်။
ဖၠုံဆိုဒ်ဖောဟ်သီး သုဂ်လင်သာ မံင်ဂိုဝ်လီးယး ခေါဟ်လံင်ခင်းထာ် ကောဝ်ၜီပြင်ပ္တီဏာင်ၯံင် ပ္တံင်ဍုံတ်ုဝါန့် အှ်ပြာထင်းဝေ့ အးစံင်းအးဖာဏ်ှလှ်။ ဖၠုံဆိုဒ်ဖောဟ်သီး ဖောဟ်မူးဖောဟ်ခွါ့လ်ုဖး ထင်းယှာႋဏေဝ်ႋဖောဟ်ဏေဝ်ႋမာ့ ထာင်အှ်ပျုဂ်မာ့ လင်ဖာယာင်ထင်းဝေ့ဍးလှ်။ အှ်ယာင်ဏှ် လ်ုဏိင်းလ်ုၜၠင်သီး ၯယ့်ထာင်ထံင်မောဝ်ႋဖာႋၯိင်းယဝ့်လိုင်အေးလှ်။ ယာင်ထင်းဍေမောဝ်ႋဖာႋ ဆိင်းပြာက်ုလာင့်ၰယ်ထင်းဝေ့ဍးလှ်။ ဆ်ုလ်ုဖောဟ်သီးယိုဝ် ခွိက်ယှိုဝ်ထဝ်ႋမောဝ်ႋဖာႋသာထုက်လာႋဏင့်သီး မောဝ်ႋဍေဖာႋဏှ် ခွိက်ယှိုဝ်ဖောဟ် သာထုက်အေးလှ်၊ ဏင်းထင်းၜးဖောဟ် မ်ုဍးၜးသာဖောဟ်မေံဏာ့ ကိုဝ်ဏီဍေလှ်။
မောဝ်ႋဖာႋဏ်ှဍဝ် လ်ုဏိင်းလ်ုၜၠင် ကိုဝ်ဏိင်းဍေ ဆ်ုဆိုင်လင်ထိုဝ်ဏှ် က်ုလိုဝ်ပူဇဴ သီ့ထၠိင့်မောဝ်ႋဖာႋဝိ(စီး)လာ ကိုဝ်ဏေဝ်ႋပ်ုကျာ ဍုဂ်အင်း ဆးအင်းဆေးအဝ် ယုက်ဂုဏ်ကိုလိုဝ် ပူဇဴၜါဝေ့ဍးဏ်ှတာႋ ထင်းယှာႋလင်ဖာဆိင်းပြာ ယာင်ထင်း ၰယ်ထင်းဖောဟ်လီလ်ုဖး ၜေမ်ုၯယ့်ထာင်ကုံ ကိုဝ်ၯာဍေသိုဝ် လ်ုဏိင်းလ်ုၜၠင် ပူဇဴက်ုလိုဝ်သီ့ထၠိုင်မောဝ်ႋဖာႋဝိ(ဝီး)လာခါ့ မာလုက်ဏေဝ်ႋဖောဟ်လီသယ် ၜးၯယ့်ထာင်ကုံ ၜးယုက်ဂုဏ်က်ုလိုဝ် ပူဇဴမောဝ်ႋဖာႋဝိလာဖၠေဏှ်လှ်။
လ်ုဏိင်းလ်ုၜၠင် ၜုဂ်ထင်းဆ်ုဆိုင်လင်ထိုဝ်ဏှ် ဖောဟ်လီဆိင်းပြာ ၰယ်ထင်း အှ်ခါန်ႋယာင်သယ်လ်ုဖး ဍေဖောဟ်ဍေ ၜးၯယ့်ထာင်ကုံအှ် မောဝ်ႋဖာႋၯိင်း ကိုဝ်ၯာဍေဏ်ှလှ်။ အှ်ယာင်ဖောဟ်လီလ်ုဖး ၯယ့်ထာင်ကုံထံင်လ်ုၜၠင် မူႋမေံၯးလင် ဆ်ုခါ်လင်ဏှ် အင်းဖံင့်ထင်းမေဝ်ဍံင်ထင်းသိုင့်ထောဝ်ယး ယးအူးထီ့လးလ်ုပါ သိုင့်ထောဝ်ယးၜၠာဏှ်လှ်။ ၜုဂ်ထင်းမေဝ်ခွါဖိုင် ဍေသိုင့်ထောဝ်ယးၜၠာလ်ုထိုဲ့ ဍေထီ့လ်ုယှူးၯံင် မောဝ်ႋဍေဖောဟ်လီလ်ုဖး ကံင်သင့်သိုဝ်သင့် ဆီ့ဏင်ထုဲလင် ပြာပြာဏ်ှလှ်။ လ်ုၯးယိုဝ် ၜးက်ုလိုဝ်ပူဇဴဍုဂ်အင်းပ်ုကျာဝီႋ မောဝ်ႋဖာႋဝိလာ မောဝ်ႋထာ်ခဝ့်ဖီ့ဖူ့ဝိလာဏ်ှလှ်။
မောဝ်ႋတုံ့လ်ုၯာ ဆောတ်ထင်းစူး ၜါထင်းမေံထုင်ႋခေါဟ်ဍာၯံင် ဆောတ်ဖးလ်ုဝါ်ထင်းဝေ့ဍး ”သီ့ထၠိုင့်ထာင်လ်ုယာ့ ထာင်အှ်လ်ုဖၠူႋကၠာ မောဝ်ႋဖာႋဝိ(ဝီး)လာသီး ၯေး – – – ၜိုဝ်ဏာင်းယိုဝ် ဖောဟ်မူးပ္တိင့်လၟံင်ႋလဝ်ႋၯိုင့်ၜးဖဝ်ႋ ၯယ့်ထာင်က်ုညာလာႋ လ်ုဖောဟ်မူးၯိင်းယိုဝ် ၯယ့်ထာင်အှ်ယှံင်ဍေဖောဟ်ဍေလီ ၯယ့်ထာင်အင်းယှံင် ဆးအင်းဆးအဝ် ဍေဖောဟ်ဍေလီလ်ုၯိင်းယိုဝ် မောဝ်ႋဖာႋသီးၯေး— ပ္တိင့်လၟံင်ႋလဝ်ၯိုင့်ၜးဖဝ်ႋ ၯယ့်ထာင် က်ုညာလာႋဆာ်” ပ္တိင့်လၟံင်ႋလဝ်ၯိုင့် မောဝ်ႋတုံ့မောဝ်ႋဖာႋဝိ(ဝီး)လာၯံင်ဏှ် မောဝ်ႋတုံ့မာဏေဝ်ႋထီ့ယှူး ဆူ့လင်ဖိုင်ထေဝ်ႋဆုဂ် သီ့ယာသီ့ယှိုင့်ခွိက် မောဝ်ႋဖာႋစူးၯံင် မာဏေဝ်ႋမေဝ်လ်ုစယ် သိုင့်လ်ုစယ်ၯံင် ဍုဂ်အင်းပ်ုကျာဝေ့ အ်ုမောဝ်ႋဖာႋဝိ(ဝီး)လာဏ်ှလှ်။
ဍုဂ်အဝ်ထာင် အ်ုမောဝ်ႋဖာႋဝိလာထီ့ၯံင် အှ်ထဝ်ႋထာင် မေဝ်ဍေသိုင့်လ်ုဖးဏှ် မောဝ်ႋဍေဖာႋဖောဟ်လီလ်ုဖး ၜးအင်းထာင်လ်ုၯာလ်ုစယ် ၜးအဝ်ထီ့ လ်ုၯာလ်ုခၠုက် ကိုဝ်ၯာဍေဏှ်လှ်။ အေဏှ် မွာဲဝေ့ဍး ပူဇဴက်ုလိုဝ်ပ်ုကျာ ဍုဂ်အင်းမောဝ်ႋတုံ့မောဝ်ႋဖာႋဝိလာဏ်ှလှ်။ လ်ုဏာဏှ် စာင်းၜးဏင်စံင်းအေး၊ ၜးမီ့ကုံထံင်ႋမောဝ်ႋဖာႋၯိင်းဏ်ှ ကိုဝ်ၯာဍေလှ်။
လ်ုခါင့်လ်ုၯးဏ်ှဍဝ် မွာဲဝေ့ဍး ၜးက်ုလိုဝ်ပူဇဴပ်ုကျာ ဍုဂ်အင်းထာင် ဖာႋတုံ့မောဝ်ႋဖာႋဝိလာဏ်ှလှ်။ လၟံင်ႋပ်ုကျာဍုဂ်အင်းအ်ုဖၠံင်ဏှ် ဍေမောဝ်ႋတုံ့ မောဝ်ႋဖာႋဝိလာဏှ် မဝ့်မှ်ၜးဍံင်ဝေ့လှ်။ ပူဇဴက်ုလိုဝ်ပ်ုကျာဍုဂ်အင်း မောဝ်ႋဖာႋဝိလာဏှ် မောဝ်ႋလ်ုၯး ဖာႋလ်ုၯး ဏီ့ၯးဏှ်လှ်။ ပူဇဴက်ုလိုဝ်မောဝ်ႋဖာႋဝိလာခါ့ဏ်ှ ဆ်ုၰာႋၰံင်ၯယ့်ၜးအေးလှ်၊ အေၯယ့်သီးဍဝ် လ်ုၯးဏှ် ထာင်ၜးလိုင်အေး၊ ၜးမီ့မိင်ထံင်ဏ်ှ လ်ုဏာဆေဝ်ႋလှ်။
ဖောဟ်မူးဖောဟ်ခွါ့ ထင်းယှာႋလင်ဖာဆိင်းပြာယာင်ထင်း ၰယ်ထင်းလ်ုဖး ၜေ့ၯယ့်ထာင်မ်ုကုံထာင်သိုဝ် ဍုဂ်ဏဲဝေ့ဍး ၜးက်ုလိုဝ်ပူဇဴမောဝ်ႋဖာႋဝိလာ အ်ုခေါဟ်ကျံင် အှ်လ်ုသှ်ေၜး လ်ုဏိင်းလ်ုၜၠင် ၜးၯယ့်ထာင်ကုံဏ်ှတာႋ လ်ုခါင့်ယိုဝ် ကိုဝ်ထာင်သာ့ဝေ့ ဍေအင်းၰယ်ဏှ်လှ်။ ဖောဟ်လီပြာထင်းဃှယ်ထင်းဏှ် ကိုဝ်ကုံဏေဝ်ႋထာင် ကာၰိက်ထာင်ဖောဟ်လီ ကိုဝ်ဝေ့ ဍေအင်းၰယ်မွာဲၜိုဝ်လှ်။ မောဝ်ႋဖာႋလ်ုအှ်လိုင်ၜးလ်ုဖး ဖောဟ်လီၯယ့်ထာင်ကုံ ၯယ့်ထာင်က်ုလိုဝ် ပူဇဴယှံင် ဖီ့ဖူ့ဝိ(ဝီး)လာဏ်ှတာႋ မောဝ်ႋဖာႋမုက်သာ စေဝ်ဍီးစေဝ်နုံ ဓံင့်ဍီးဓံင့်နုံဏှ် စိုင်ထင်းဝေ့ ဍလေူးဖၠာင့်အွာ ဍုဂ်လိက်ထင်းဖောဟ်လီ လ်ုၯာလ်ုဖၠီ ဖှ်ေလင့်အင်းဏင်ဝေ့ ကိုဝ်ၯာဍေဏ်ှလ်ှ။ ဖောဟ်လီလ်ုဖး အေထာင်ဖီ့ဖူ့အ်ှ ဏေဝ်ႋၜးစေဝ်ဓံင့် သုင်းၰုဲ့သာယွာ လ်ုဏိင်းလ်ုၜၠင် ၯယ့်ထာင်ဝေ့ ကိုဝ်ဏိင်းဍေဆေဝ်ႋလှ်။ လ်ုခါင့်လ်ုခါင့်ယိုဝ် လင်ဖောဟ်လင်လီအ်ုထဝ်ထဝ် ဖှ်ေလင့်ဍေစေဝ်ဍီးဓံင့်ဍီး လ်ုဏေဝ်ႋလိုင်ၜဏှ်တာႋ သွးထံင်ႋဏှ်ပါကဲဓံင့်၊ ၜယ်ၜၠာ်ဏ်ှပါကဲစေဝ်ၯံင် ဍုဂ်လိက်ထင်းဖယ့်စေဝ်ဖယ့်ဓံင့် လဝ်ဝေ့လှ်။ ထူရှု့လ်ုမိင်ဏှ် အှ်လင်ထေံဏေဝ်ႋမိင်ဝေ့ ခံင်ၜိုင်ဏာင်းယိုဝ်လ်ုဏင်ဏှ်လှ်၊ ဖၠုံဆိုဒ်ဖောဟ် လ်ုခါင့်လ်ုခါင့်ယိုဝ် လင်ဖောဟ်လင်လီအ်ုထဝ်ထဝ် ပူဇဴက်ုလိုဝ် သီ့ထၠိုင့်မောဝ်ႋဖာႋဝိလာဏ်ှ ကိုဝ်ဏေဝ်ႋဝေ့ ဍေဆ်ုအင်းၰယ်ၯံင် ပ်ုကျာဍုဂ်အင်းမောဝ်ႋဖာႋဝိလာ ဆးအင်းဆးအဝ်ဏ်ှသီး ထုဂ်ပေဝ့် မာပေဝ့်လင်ထာင်ဝေ့ အ်ုထဝ်ထဝ်သီး အှ်လ်ုဏင်လှ်။ လ်ုဏင်ဏ်ဍဝ် တွ်ုဝယ်လ်ုမောဝ်ႋဖာႋဖီ့ဖူ့ စူးဖိုင်အ်ုထဝ်ထဝ် ပူဇဴက်ုလိုဝ်ဍုဂ်အင်း မောဝ်ႋဖာႋဝိလာ ဍေသိုင့် ထောဝ်ယးၜၠာဏ်ှ လင်ဖောဟ်လင်လီအ်ုထဝ်ထဝ် ခံင်ၜိုဝ်ဏာင်းယိုဝ်ဍာ်သီး အင်းၰယ် ဍေထောဝ်ဏှ်ဍာ်လှ်။
လ်ုဏင်ဏှ် မာဏေဝ်ႋလိုင်အေး၊ ဍုဂ်အင်းပ်ုကျာထာင်ဝေ့ ဍေဆင့်ယး အင်းဖံင့်ၜၠာဏှ်လှ်။ လ်ုဏင်ဏှ် ဆင့်သီးမာလိုင်အေး၊ ဍုဂ်အင်းပ်ုကျာထာင်ဝေ့ ဍေယးၜိုင်သယ်ဏ်ှလှ်။ လ်ုဏင်ဏှ် ယးသီးမာလိုင်အေး၊ ဍုဂ်အင်းပ်ုကျာထာင်ဝေ့ ဍေမေဝ်အာင် မေဝ်သေဝ်ဏ်ှလှ်။ လ်ုဏင်ဏှ် မေဝ်အာင်မေဝ်သေဝ်သီးကးၯယ်ဍာ် ဍုဂ်အင်းပ်ုကျာသာ့ဝေ့ မေဝ်ဍေဍိင်းဝေံဏ်ှလှ်။ မေဝ်ဍေဍိင်းဝေံအ်ုဖင့်လဏှ် ထုဂ်ယှာ ထုဂ်ပေဝ့်ဏေဝ်ႋလိုင်အေး၊ မေဝ်ဍေဍိင်းဏှ် ကဲဝေ့အ်ုပေဝ့်ထုက်ဏှ်လှ်။ ”ဟ်ုထုဂ်ပေဝ့်ထုဂ်ယှာလင် ထူရှု့မုင်ႋၜျာသီးယိုဝ် မွာဲဝေ့ဍး ဟ်ုမာပေဝ့်မာဖိုဟ်လင် ဟ်ုဆိုဒ်ဆအ်ုဖၠံင်ဏှ်လှ်။ ” ကေယင်ႋဏ်ှ မာပေဝ့်လင်လ်ုၰေဝ် မာဍောဟ်ထင်းထာင် ခဝ့်ဏ်ှ ၯေဝ်လုက်ထုက်လှ်။
ဖၠုံလိက်ပဝ်ႋဆီ့ဆင့်
Leave a Reply