လ်ုအ်ုဝီႋဍးအိုဝ် ဖူ့ထောဝ်မဲဖါႋ တါ်ခေါဟ်လ်ုယာ့ ဖၠုံဆိုဒ်ဖေါဟ်လ်ုဆုက်ၮှ် ယှူးယှူးၜါၜါအှ်သီးဝေ့ဍး လ်ုခင်းထါ်လလ်ုခဝ့်အိုဝ်လှ်။ ဖူ့ထောဝ်မဲဖါႋယိုဝ် အ်ုၯာင်ႋဆံင်းၜျာဆံင်းၯံင် ထံင်အ်ုသီးၰီးၰုဂ်ဆ်ုလင်ႋဍာအိုဝ်ၮှ် ခေဝ့်၊ ထောဝ်မိင်လ်ုဖး ၯယ့်ၜုင်းဝေ့ၮင်ဍူအေး။
အှ်လ်ုၮီ ဍေဖူ့ထောဝ်မဲဖါႋ အ်ုၯာင်ႋဆံင်းၜျာဆံင်းအ်ုကျံင်ၮှ် လ်ုသီးယာ့ၜး ထောဝ်မိင်ဖါဍောဟ်လ်ုဍူ ၯယ်နုက်လင်မာၯာၯံင်ဝေ့ လ်ုဖူ့ထောဝ်မဲဖါႋ အ်ုဖေါဟ်လီသီး သုင်းလင်ထံင်းလင်ထ ဆ်ုထါ်ဆ်ုၜံင်ကၠာလ်ုဖးၮှ်လှ်။ ဖေါဟ်လီသီးလ်ုဖး ၯယ့်လ်ုဖူ့ထောဝ်မဲဖါႋအှ်ၯံင် “ဟေးဖူ့ ဟေးဖူ့´´လင်ဟ်ုသာမဲ ထောဝ်မိင်ဖါဍောဟ်လ်ုဍူ ၯယ့်မာၯာၯံင်ဝေ့ ပ်ုကၠောဝ်ပ်ုယှောတ်ယုဂ် အင်းသံင်းဖှ်ေလာႋ ထောဝ်မိင်ဖါဍောဟ်ၮင်ထီးၯဟ်၊ လဝ်ၯိုင့်ၜးသီးဝေ့လှ်။
ဖူ့ထောဝ်မဲဖါႋခဝ်ဍဝ် ဟှေဝ်ယုဂ် ၮှ်လဝ်ဝေ့ၯံင် လေဝ်ဝေ့လ်ုထောဝ်မိင်ဖါဍောဟ်အှ်လင်ႋဍာအိုဝ်လှ်။ ထောဝ်မိင်ဖါဍောဟ်ၮှ် ဍးဖူ့ထောဝ်မဲဖါႋလ်ုၜၠင် သာၯယ့်ထင်းဆ်ု စွးစွးလေံၯံင် အိင်ထင်းအ်ုမဲခွါင်ၮှ် ၜှ်ေဝေ့ဖူ့ထောဝ်မဲဖါႋလှ်။ လာၮင့်သီး ဖဝ်ႋထောဝ်မိင်ဖါဍောဟ်လ်ုခၠုဂ်ၜှ်ေဍာ်အ်ုခါ့ ဖူ့ထောဝ်မဲဖါႋခဝ့် လ်ုသုံႋ(မာ)ဝေ့စူးဖံင်းခင်းလာင်ၮင်မိင် မာသီ့ခွိက်ဝေ့ ထောဝ်မိင်ဍေအ်ုစူးဍူးခီ့ၮှ်လှ်။
ထောဝ်မိင်ဖါဍောဟ်သီ့လ်ုၜၠင် ဖူ့ထောဝ်မဲဖါႋၮှ် အင်းမာႋၮေဝ်ႋဝေ့က်ုယာဲထောဝ်မဲ ထုဲႋၮှ်လှ်။ ထံင်ၮှ် ထောဝ်မဲထုဲႋၮှ်အိုဝ် တါင်ၮေဝ်ႋဝေ့သီးခုဲ့ခေါဟ်ဖောဟ်လ်ုၜိင်းၯံင် ဆံင့်ထဝေ့လှ်။ဍေထောဝ်မဲထုဲႋ အ်ုစံင်မင်ၮှ် အ်ုခေါဟ်ကျံင် လ်ုထီးၰင်ႋ ၜင်းလင်ဝေ့လှ်။ ၯာင်ႋၜျာသီးဆံင်းထင်းဝေ့လှ်။
ၮိင်းလာယိက်ထင်းလ်ုၜၠင် လ်ုဖူ့ထောဝ်မဲဖါႋသီး အှ်လင်ႋဍာၮှ်ဟ်ုမၞီဟ်သယ် အးထင်းဝေ့လှ်။ ဖေါဟ်လီသီးလ်ုၮင်ဍဝ် ထံင်ဆ်ုလင်ႋဍာၮှ်အှ်ၜးသာလိုင်အေးၮှ်လှ်။ စင်ၜိုဝ်ၮှ်အ်ုခေါဟ်စံင် ဟ်ုသီးလ်ုဍံင်းၮှ် လေဝ်ဝေ့လ်ုဖူ့ထောဝ်မဲဖါႋအှ်ၯံင် “ဖူ့ဟေး ဆ်ုလင်ႋထံင်ယိုဝ် ဟ်ုအှ်ထဝ်ႋလိုင်အေး ပ်ုသီးလ်ုဍံင်းယိုဝ် မ်ုလေဝ်ပၠံင်ၯာအှ်ၜးသာ လ်ုမေံထာခေါဟ်ခဝ့်အိုဝ်လှ်။ လ်ုမေံထာခေါဟ်ခဝ့်ၮှ် ထီ့ခၠေါဟ်၊ ၜီခၠေါဟ်၊ ၮံင်း၊ ကၟာ့သီးလ်ုဖး အှ်အးဝေ့လှ်။ ယး၊ ၜူး၊ ဆ်ုဖောဟ်ဆ်ုၜံင်၊ သိင်းသူးဝးသးလ်ုဖး အှ်အးၮှ်သီးၯိုင့်ၜးတယ်လှ်။ လေဝ်အှ်ၜးလာႋ လ်ုမေံထာခေါဟ်လ်ုခဝ့်ၮှ် အင်းကိင်သီးဝေ့ဆ်ုပၠယ်တဝ်ၮှ်လှ်။
ထံင်ၮှ်သိုဝ်လ်ုၜၠင် ဖူ့ထောဝ်မဲဖါႋဍဝ် “ဟှေဝ်ယုဂ် ယ်ုဖေါဟ်ယ်ုလီလ်ုဍံင်းအေလေဝ် ပၠံင်အှ်ၜးသာ လ်ုမေံထာခေါဟ်ခဝ့်အိုဝ်စာ်ၜိုဝ် မ်ုလေဝ်ၯိုင်ဖှ်ေၮှ် လဝ်ဝေ့လှ်။ ထံင်ၮှ်လ်ုၜၠင် ဖူ့ထောဝ်မဲဖါႋ တါ်ခေါဟ်လေင်ႋၯံင် ဍေဖေါဟ်လီလ်ုဍံင်း ၯယ့်စာင်းလင်ဝေ့ လ်ုမေံထာခေါဟ်လ်ုခဝ့်အိုဝ်လှ်။ ၮိင်းလာယိက်ထင်းလ်ုၜၠင်ထံင်လင်ဝေ့ ထီ့ဍေပ္တီယွာထင့်အှ် ထီ့ခၠေါဟ်ဖါဍောဟ်လ်ုၜံင်အိုဝ်လှ်။ ဖေါဟ်လီသီးလ်ုဖး ထံင်ပ္တီခၠေါဟ်ဖါဍောဟ် တ်ုမၠင့်(မ်ုလင့်)ၮာင်အိုဝ်ၮှ်အင်းထိုင်ၮေဝ်ႋ ခၠေါဟ်သယ်ၯံင် ဍုဂ်(ဆူး)လင်လ်ုဖိုင် အင်းၰုဲႋထင်းဝေ့လှ်။ ခၠေါဟ်သယ်မိင့်လ်ုၜၠင် လ်ုခၠေါဟ်ကူဖိုင် အ်ုယးၮှ်မ်ုမာၮေဝ်ႋအင်းသီးဝေ့လှ်။ လာၮင့်သီး မာၮေဝ်ႋအင်းခၠေါဟ်ယး လ်ုသှ်ေပ်ုသာ်ၜးအ်ုခေါဟ်ကျံင် အ်ုၜုံဆိုင်ယ်ိက် ထိက်ထခွ်ိက်သာ လ်ုပေဝ့်ၮှ်လှ်။
ဖူ့ထောဝ်မဲဖါႋလ်ုၯာ ဆ်ုအုဲကျောဟ် ဖၠာ် ယိက်ၮင်ႋၮှ် အဲဍိုဝ်ၜးသာဝေ့အေး။ ဍေဆ်ုၮှ်အ်ုခေါဟ်ကျံင် “ယ်ုမ်ုလေဝ်ဝီႋလ်ုယာ့၊ လေဝ်ဖိုင်သာၮှ် ယ်ုမ်ုဖေံၮါင်းလင်ထ ဍေသာကုဲထုင်းသီးၮှ်လှ်။ ဖေါဟ်လီသီးဟှေး ၮ်ုသီးအင်းအဝ်အေၯံင်ခိုဝ်းလ်ုၜၠင် ယောဝ်ႋၮေဝ်ႋသာ့ သာကုဲထိုဝ်သယ်ယိုဝ် ၯယ့်လံင်ဆံင်ႋထါင်ထာင်လာႋယ်ု အေခၠုဂ်ၯဟ် လဝ်မာလုက်ဝေ့ဖေါဟ်လီသီးၮှ်ၯံင် လေဝ်သာ့ဝေ့လှ်။
ဖေါဟ်လီသီးလ်ုဖး လ်ုပ္တီခၠေါဟ်ဖါဍောဟ် တ်ုမၠင့်ၮါင်အိုဝ်ၮှ် ဖံင်းသီးဝေ့ခၠေါဟ်သယ် ၜၠယ်ၜၠယ်ၮှ်လှ်။ ထံင်ၮှ်လ်ုၜၠင် အင်းၰုဲႋအင်းၜၠယ်ၜၠယ်ၯံင် အှ်ပွါ်သီးဝေ့ဍးလှ်။ ၜေအိုဝ်သိုဝ် အှ်ပွါ်သီးဝေ့ယိက်ထင်းလ်ုဖိုင့် လေဝ်လံင်ပျထါင် ဖူ့ထောဝ်မဲဖါႋအ်ုခါင့်ၮှ်လှ်။ လာၮင့်သီး ဖူ့ထောဝ်မဲဖါႋ ဍင်းလင်ထဝယ် သာကုဲထိုဝ်လ်ုဖး ဍိုဝ်ဍူးထင်းထါင်ၯံင် ကဲထင်းသာ့ဝေ့ သာကုဲထုင်းဖါဍောဟ်သယ်ယုဂ်ၮှ်လှ်။
စင်ၜိုဝ် ဖေါဟ်လီသီးလ်ုဖး လေဝ်ထါင်လ်ုၜးလိုင်ၯံင် ၜးခၠိုဝ်လင်သာ့သီးဝေ့ထၟုင်ႋ လ်ုပ္တီခၠေါဟ်ဖါဍောဟ် တ်ုမၠင့်ၮါင်အိုဝ်လှ်။ ပ္တီခၠေါဟ်ဖါဍောဟ်ယိုဝ် “မွာဲကၟဝ့်ယှောတ်ခၠေါဟ်သီး”ဆ်ုလဝ်ဝေ့ အှ်လ်ုၮင်လှ်။ ဖူ့ထောဝ်မဲဖါႋၮှ်ဍဝ် ဆောဝ်ထင်းဝေ့ သီးထောဝ်မဲထုဲႋ လ်ုခေါဟ်ၰုဲးၯံင် ဆ်ုလေဝ်အှ်လေဝ်သာ့ဝေ့လ်ုယာ့အိုဝ်လှ်။
( ဖၠုံလိက်ပဝ်ႋၰူ့ဆင့် )
Leave a Reply